Dat niege Johr fangt jo goot an!

Alarm, Alarm: Lüüs inne Scholl un in’n Kinnergoorn.

Dat weer mien ersten Schooldag. De Mütz weer en olen Koffiwärmer, den man freuher över de Koffikann stülpt hett. De Mantel weer en olen Bodemantel un de Scheuh weern ut Pappe. De Tüüt hett Tant’ Käte mookt mit veele, veele scheune Soken binnen. To’n Bispill enen richtigen Ball ut Gummi un een Riesenlolli ut de CONDI vun dat Hotel Vierjahreszeiten. Dor weer Tant’ Käte Pralinenpackerin.

Uns School weer en oole Baracke an’n Mittelweg. Fräulein Büscher weer uns Lehrerin. En ganz seute Deern. De Klass weer al 1948 Multikulti. Veele Kinner ut „Inquartierung“ in de grooten Wohnungen, Diplomatenkinner, de vun’n Chauffeur mit Auto bröcht worrn. Nich to vergeten de Lagerkinner. To de wi Pissnelken seggt hebbt, wiel de asig stunken hebbt.

In de tweete Klass müssen wi al enen Opsatz schrieben över den Besöök bi Hagenbeck. Mien Opsatz hett’n Pries kregen: „sehr lebhaft und lebensecht geschrieben“ stunn dor ünner. Scheune twee Johren weern dat. Denn sünd wi no Billstedt trocken un de School weer en Olenhuus. Groot, kolt, gräsig.

De Schoolmeester keem wohrschienlich ut’n 1. Weltkrieg, harr ik den Indruck.

Keene Schoolbeuker, keene Leeder, obers — Lüüs, jede Menge. Jeedeen Dag weer wedder een to Huus bleven. De Lüüs wurrn mit allerlei Chemie to Liev gohn. De ganze School hett stunken. Bi veele Kinner harrn se ok den Kopp kahl raseert wenn de Lüüs eenfach nich verswinnen wullen un de kemen denn mit’n Mütz no School.

Un Ik ? — harr nich eene Luus! Jedeen Dag muss ik no School. Un wiel in de Klass jümmers weniger Kinner weern, mussen wi op den Stoff alleen doolgohn. Ne, denn doch lever Lüüs. Un richtig, endlich harr ik se, Mudder un twee Kinner op’n Kopp. So, nu kunn ik ok to Huus blieben! Denkste: Wittet Poppier, de Hoor no vörn un jümmers mit den Spezialkamm dörch de Hoor. Dat hett beus zwickt un zwackt. Ik heff obers nix seggt. Un Mudder un Kinner klackern op dat Poppier. Dennoch wuschen mit dat Stinkemittel un de Lüüs weern weg. Schiet ok.

No kotte Tiet weer dat Thema dörch un wi harrn annere Soken in’n Kopp un ik keem in de modernste School vun Norddütschland.

Un Nu, in dat 21.Johrhunnert mit 200, in Worten: tweehunnert, verscheden Hoorwaschmittel/Duschmittel (ik heff dat tellt, würklich) allens „klinisch getestet, sünd de Beester wedder ünnerwegens op’n Kopp. Wo kümmt de her?

Multikulti? Kann ik in de Lodens noch’n Mütz proberen? Mit’n Bus fohren?

Un Sünndag lees ik Kinner wat vör! Oh nee, wat mook ik blots? Dütmol will ik keen Lüüs hebben.

Un – wetst wat? mien Aftheker hett mi enen Flyer tostüert = Läuseplage – dann nehmen Sie doch L …

Da geht der Laus die Puste aus!

Ne, ik goh glieks no Huus un wasch mit eerstmol de Hoor. Dat kribbelt so gediegen op’n Kopp!

Silke Frakstein