Home office orrer Piep-Show

För mi heuert dat irgendwie tosomen

Piep Show hett nix mit „Piepmatz“ to doon, nee, dat is dat, wo de Mannslüüd hengoht (Froonslüüd heff ik dor noch nich sehn) un dörch so’n lütten Kassen mit ’n Lock binnen, sik de nokelten Froonslüüd ankiekt. De Deerns sitt dor op ’n Stohl un mookt Gymnastik un allerhand annere Soken. In de Sauna köönt de Mannslüüd dat ok hebben, obers dor mookt de Froonslüüd natürlich keen Gymnastik.

Ganz ehrlich: In’n Zoo is dat doch ok nix anners as in Peep Show. De Apen kickt uns an. Un wi de Aapen, ton Bispill. Wi denkt: „Nee, wat sööt“ un de Apen denkt: „Wat glotzt de mi so an.“

Wenn wi in Blanknees orrer Övelgönn sünd, denk ik männichmol: “De Lüüd, de hier wohnt, feuhlt sik doch seker ok as in so’n Peep-Show. Jeedeen kickt di in de Koffitass.
Schietbüdel un ik sünd jo nu ok al ’n beten länger verheiroodt un köttens hebbt wi een Jubiläum „Im kleinsten Hochzeitshotel der Welt“ fiert. Dat weer as in’n Droom un een Peep-Show geev dat ok. Dat Huus is 400 Johr oolt. Lütte Stuven, lütte Finster, allens mit Rosen un Ranken utstaffeert un liggt merrnmang in een Touristenviertel. De Stroten sünd small un dat wrangelt un quetscht dor allens dörch un an dat Huus vörbi. An dat Huus steiht natürlich „Hochzeitshaus“ an.

Wi sitt an’n Koffidisch mit allens, wat du di bloots wünschen kannst. So bi Klock teihn koomt de eersten „Touries“. Jeedeen blifft stohn un kickt op de Tofel, wat dor allens so schreven steiht över dat Huus un denn – goht se in de Knee dool un kickt dörch den smallen Schlitz twüschen Rosen un Gardine dör op unsen Koffidisch.
Tjä, schüllt wi nu villicht Faxen moken? Nee, dat mookt de dor buten al. Een Mannsbild mookt dat to dull, un dor kriggt he een saftigen Buff vun sien Fro. Af un an pingelt de sogor an de Huusdöör.

Ik sitt dor in mienen witten Bodemantel un lang mi de Sektbuddel her, dor kriescht so’n lütte Deern: „Oma, Oma, ich hab die Braut geseh’n und die hat sich bewegt!“ Dor hebbt wi de Gardinen dichtmookt un de Peep-Show weer to Enn.

De niege Trend för Home office is Face Lifting. Boben allens glatt un ünnen de Schlotterbüx un Puschen.

Oben Hui und unten Pfui, hett mien Mudder jümmers seggt.

Silke Frakstein

Weitere plattdüütsche Werke finden Sie unter frakstein.de