Wenn Engel op Reisen sünd

… lacht de Heben

So weer dat ok op unsen Utflug an’n 12. Mai 2016 = Molfsee un Slott Gottorf.

Sünn, ober rugen Wind vun morgens bit an’n Obend. Dat frische Greun an Busch un Bööm weer wat för’t Hart un dortwüschen jümmers wedder de geele Raps.

As wi över den Kiel Kanol fohrt sünd, weer dat en Bild as Kitsch, so scheun. Blauet Woter, op jede Siet von de Brüch en Schipp in rot un geele un greune Feller dorto.

In Molfsee, 40 Hektar groot, 60 historische Hüüs, weer eerstmol tippeln anseggt. Loter denn rin de lüttje Bimmelbohn. Jeedeen Buurnhus is anners. Mit veele oole Soken binnen un Verklorungen över Kopphörer. Allens bannig interessant.

De Warksteed vun de Korbflechterei weer op, un ok in de Töpferwarksteed kunnen wi tokieken: Wat hebbt de Lüüd freuher doch arbeit’t. Ik frei mi duppelt över Waschmoschien, Huulbessen un Geschirrspeuler etc. p.p.

Eegentlich kunn man den ganzen Dag op dat Gelände tobringen. Wi hebbt Klock twölf fein Middageeten un halvig twee güng dat wieder no dat Slott. Hier hett jeedeen no sien Denken sik wat ankeken. In dat Slott, in’n Peerstall orrer den Barockgoorn.

Klock veer geev dat Koffi un Koken, un denn no Huus.

De Autobohn is Bustell vun Anfang bit Enn. Ober Stau harrn wi nich.

So güng en feinen Dag to Enn.

Een großes Dankeschön an Wolfgang Häßler.

Silke Frakstein