Vun‘t Mittelöller bit hüüt
»Adelheid, Aldelheid…
Schenk mir einen Gartenzwerg, mit ner Zipfelmütze« – dat Leed hett sogor Bill Ramsey sungen.
Woso schriev ik wat över düsse lütten Dwargen?
– Wohrscho an de Froonslüüd, Dwargen sünd Mannslüüd, dat is nu mol so –
Een Hus in de Noverschop, mit’n groten Goorn, warrt no den Dod vun de Grootöllern verköfft. Opa much de Dwargen bannig gern lieden und de Goorn, un allens ringsum, weer´ vull vun düsse lütten Dinger.
Dat niege Huus weer en „hochisolierten Schuhkarton“. Un wat schall ik Di seggen: De Lüüd in’n Parterre harrn no kotte Tiet den lütten Goorn un allens ringsüm vull mit de lütten Dwargen vollstellt.
Na, un dat hett mi neeschierig mookt. In Düütschland gifft dat 25 Millionen Dwargen in de Goorns. In enen Goorn stohn sogor 4.443 Dwargen.
Dat mit de Dwargen is ok keen Thema vun hüüt. Nee all in dat Mittelöller weern de Gnome (so hett man freuher seggt) aktuell. Magische Kräfte in Märken un Sagen harrn se, seggt man. Un in’n Barock stunn se al in de Goorns. In den Salzburger Dwargen Goorn sünd de Lütten ut witten Marmor un 320 Johr oolt. De Dwargen an’n Fürstenhof kunnen sik so allerhand „rutnehmen“ un de Schranzen de Menen seggen. Op dat Slot Gamberg steiht ‘n Sandsteinfigur vun 1720. Bi Goethe geev dat notürlich ok enen Dwarg. Un in de Märken vun de Bröder Grimm ganz seker. Nich to vergeten Thomas Mann.
In Thüringen sünd de lütten Macker denn toerst in Serie gohn. Noch vun Hand. Een Dwarg, dat weern deelwies 10 Deele. Hüüt is allens maschinell un ut Ton orrer Plastik. 2021 weern de Lütten in de Coronatiet in Ingland Mangelware. Un denn gifft dat noch Fruchtzwerge un Schlümpfe.
Froonslüüd sünd jümmers noch so hier un dor, villicht. Obschoonst in dat Barock gor nich mol so selten de weiblichen Dwargen in dat Sortiment weern. Dat weer so’n Ort Verballhornung: Gräfin Roda = Gräfenroda in Thüringen. Un wat is nu mit Adelheid?
Adelige – Die Edle – die Vornehme.
Also, op unsen Balkon kümmt nu ‘n lütte Deern. Denn ik bün emanzipiert. Un wenn Di dat allens toveel is, dat gifft in Frankriek „Gartenzwerg Befreier“. De hebbt sogor enen Afscheedbreef mit den Text:
»Liebe Eltern, ich bin bei Euch glücklich gewesen. Aber ich muss Abschied nehmen.«
Gez. Euer Gartenzwerg
Silke Frakstein