An Denken an Frünnschaft, Alltag un en Stück Levensfreid
Bi de Hitten kottens weer ratz, fatz de Waschmaschien full. Klor, allens ut Baumwolle vunwegen Sweet usw. Dröög weer dat ok fix, un denn … tjä, dennso keem de Stress: Plätten. Also Koken, Backen, Knütten, is allens keen Problem. Ober Plätten!!
As lütte Deern weer dat noch anners. lk harr so‘n lütt Kinnerbögeliesen. lk glööv dat stunn op‘n Herd un ik weer nu mit Freid dorbi de Taschendöker, in de 50 Johren geev noch keen Poppier, glatt to kriegen. Mien Mudder hett mi ok jümmers seggt, wo fein ik dat mookt harr. Dat weer sünst nich ehre Ort.
As Teenager keem denn Trevira un Nyltesthemden op‘n Markt. Dat mit de Nyltesthemden weer ober en Flop. De mehrsten Lüüd mit düsse Hemden weern „Stinkbüdel“ un de Hemden weern gau in de Versenkung verswunnen.
Loterhen weer so‘n Mischmasch aktuell un ik stoh wedder mit‘n Bögeliesen no Fierobend in de Stuuv. An‘n Freedag mit‘n Krimi in de Glotze güng dat denn beter.
Op unse Radtouren weer dat allens egol, an‘n Dag, un för Obends harrn wi Pflegeleicht in‘n Kuffer.
Ober nu is wedder Baumwolle „in“. lk stoh also wedder an‘t Bögelbrett un denk an Di, mien leeve Margrit.
61 Johr hebbt wi uns kennt un kott vor ehren 87. Geburtstag is se vun düsse Welt gohn. Plätten weer ehr Profeschoon un jümmers hett se mi vertellt wo un wi dat mookt warrt.
Wi harrn noch enen wunnerboren Nomiddag tosomen. Mit Plattdüütsch Theoter un Koffi un Koken in ehr scheune Wohnung.
Plätten hett nu en ganz annere Bedüden – ik seh un heuer Di dorbi.
Adschüs!
Silke Frakstein