Utkiek mit Sahnetorte
„Pingsten is, de Dag is schön“.
Jo, Joachim Mähl hett recht.
Wat weern dat scheune Dog. Bit Freedag harrn wi noch bannig veel Küll un Grog un Pullover weern wedder anseggt. Obers denn, an’n Sünnavend, nich eene Wulk an’n Heben un as de letzten noch bi dat inkäupen weern, harrn de annern all den Grill ansmeten.
Sünndag, warm un scheun, ok wi weern an’t grillen. De Autobohn weer full un wi hebbt uns dat allens in Roh ankeken. Un doch, siet der Tiet vun Hein Köllisch hett sik nich veel ännert.
„Vadder deiht för’n annern Morgen düchtig Proviant besorgen“. Goh doch mol rin bi’n Slachter, orrer Feinkost Albrecht.
„Nein, nein, nein. Wir nehmen Steak und die Kinder kriegen Würstchen.“
„De Vadder geiht vöran, mit de witte Maibüx an.“
To Foot is jo fast keeneen mehr ünnerwegens. Obers mit Fohrrad. Un jümmers noch in de sülbige Formation:
Vadder vörn weg in de niege Outdoor Büx un Jacke. Hightech Fohrrad, 21 Gänge, ohn Gepäckträger.
De Kinner in de Mitt. Kinnerfohrrad mit Wimpel, Helm op un lacht un freit sik.
Mudder achterno. Fohrrad vun 1965, Dreigangschaltung, Körbchen vörn, Körbchen achtern. Vull mit Botterbroot, Thermosbuddel, Saft, Schüffel, Ammer vör de Lütten, un bovenop noch de Wulldeek.
So ackert se de Brüch rop, un ik kiek mi dat allens in Roh an. Wi denn jo ok los, Richtung Wulfsmühle. Un dor merrn in de Walachei hebbt en poor Landfruun to Pingsten en Cafe op de Been stellt, Lage 1A. Vun dree Sieden kümmt de Lüüd. Op Inliner – de süht un heuert nix – hebbt de Musik in de Ohren (Wo to sind eegentlich noch de Piepvogels dor?).
Bi de Radfohrers kannst Wetten afsluten: Dree Lüüd – He will nich (gifft jo keen Beer), ober de Froonslüüd wüllt – basta. Oma un Opa fohrt ok vörbi. Ober nee, is noch keen Koffietiet. De hebbt grod ehr Middageten dol. Un junge Lüüd sünd an’t schnattern un hebbt mit’nanner to dohn.
Un so geiht dat rin un ruut un ik sitt bi dat drütte Stück Sahnetorte.
„Op eenmol, wie gemeen, ehr ener sik versehn, dor kümmt vun boben dol en Regen kolossol.“
Un so ok hüüt. Dat heuert to Pingsten dorto un is ok ganz wichtig, denn – all de Radfohrers, Inliner etc. mööt jo mol ut de Büx un dat mookt se bi Mudder Natur, un dat mutt jo verdeelt warrn – orrer nich?
Also, de Regenklamotten nich vergeten.
Silke Frakstein
Weitere plattdüütsche Werke lesen Sie in Silke Fraksteins Internetauftritt: frakstein.de.