Is dat komplizeert
Mien Dükersieder weer twei. Dat weer so’n lütten, so för Reisen un Camping. Hier in Neendörp hebbt wi jo noch all de Lodens to’n inköpen. Un in’t Blatt stunn en groot Artikel över dat Thema. Wo scheun un praktisch so’n lütt Ding is. Ober, dor hett’n Uul seten. In de Lodens hebbt se mi mit grote Ogen ankeken, un: „Nein, so etwas führen wir nicht mehr.“ Also no de Stadt. Noch gifft dat jo Koophüüs. Nix, nix, nix. Kinners, wo leevt wi denn?
Wat blifft – Internet. Un dor weern se. Wohl so an de 100 Stück. En Anbieter: blots mit Visa Card orrer Pay Pal = Nee mook ik nich. Dennso Klarna mit Reken. Dor mutt ik mi nackt uttrecken un se verlangt dat Kalf dat Kind af. No dat veerte Passwort gifft dat enen Code (nich Kot). Ober de warrt nich annohmen. Also wedder seuken. Een mit Vorkasse.
So, un tööv ik: Ihr Paket ist in Bearbeitung, Ihr Paket liegt bei DHL, 4 Tage. Dann endlich: Ihr Paket kommt wahrscheinlich heute. Na wunnerbor. So twüschen dree un veer kümmt jümmers de Wogen. Allens klor. De Wogen weer so gegen halvig twölf dor, un ik op’n Markt. Mi deit de Kerl vun de DHL jo leed, ober wenn de sik nich organiseren köönt, mutt ik mi keen Gedanken moken. De Dükersieder is 15 cm groot un de Verpackung is en Schuhkarton. Mi gefallt dat allens gor nich. Schall ik mi festbacken? An den PC? An den Wogen vun DHL? Eegentlich wull ik blots enen lütten Dükersieder käupen. In 1 Stünn weer ik dormit dörch. Un nu? Dree Dog för NIX un’n Barg Müll.
Un all de Lüüd mookt dat mit. Bi de Nobers kümmt jeedeen Dag en Paket un bi uns warrt klingelt (un sik nicht bedankt). Bi de Paket Shops is Stress. De Wogens suust dörch de Gegend. Wat’n Irrsinn. Ik glööv ik warr oolt.
Silke Frakstein